Matandang dalaga na daw ang 25 kaya sa age ko na lampas 25 ay dapat na akong magpakasal.
Wala namang problema pero dahil babae ako, at wala sa plano ko, hindi ko pwedeng pangunahan ang aking kasintahan na magpakasal agad agad.
Palibhasa kasi mga nauna silang naglaglag ng mga panty nila kaya nauna din silang nasakal nakasal at ngayon gusto din nilang gayahin ko ang ginawa nila.
Aaminin ko pareho na din naman namin gustong magpakasal kaya lang ayaw naman namin na susugod kami sa laban na wala man lang kahandaan. Pinangangalagaan ko din naman ang mga sarili at pamilya namin mula sa kahihiyan. Sino ba ang ayaw na maging legal na magyakapan at maghalikan sa harap ng mga kaibigan at mga magulang na hindi maiintriga at magkaroon ng kalayaang mabuntis nang hindi nachichismis?
Minsan nga, gusto ko na lang sabihing break na kami ng kasintahan ko para lang tigilan na muna nila ako sa pangungulit tungkol sa kung kailan namin sila mapapahigop ng mainit na sabaw. Buhusan ko pa sila nun pag nagkataon (joke).
Sabi nga ng gasgas nang kasabihan, "ang pag-aasawa ay hindi parang kanin na isusubo na kapag napaso ay iluluwa". Wala naman akong balak na iluwa ang pangakong binitiwan ko sa harap ng madlang people na ang tanging hangad lamang ay lafang ang aming kaligayahan.
Darating din naman kami dun. Makakasal at makakasal din kami kaya lang hindi pa sa ngayon. At ang pag-aanak ay saka ko na iisipin. Kung ibibigay man ni Lord yun, kahit kulubot na ang aming mga balat ay mangyayari. Magmadali man kami kung di talaga magkakaanak ay problema lang ulit yun.
Sa totoo lang, napakalaking pressure yun sa mga taong katulad ko na di pa naman talaga nahuhuli sa byahe ay halos ipa-rape na para lang makapag-asawa.
Iba na talaga ang mundo ngayon. Noon kahit matandang dalaga na ay bawal pang maligawan. Ngayon naman, ayaw pang mag-asawa ay halos ipamigay na para lang mapakasalan.
