Sa Jeep: Ang mga pasahero (repost)

Araw-araw, gabi-gabi, iba't ibang tao ang nakakasabay ko sa iba't ibang jeep. Merong mukhang di makapatay ng lamok sa payat, merong halos kumain na ng pang-tatlong taong upuan ang isang pasahero, may nakakasilaw ang puti sa sobrang bleach, may durong (sobrang) itim na mas maputi pa ang anino, may mabango, may mabaho, may bagong gising, may kulang sa tulog, may A(H1N1) virus na carrier (mukha lang), mukhang addict, mukhang holdaper, mukhang rapist, bading, lesbian, manyak, exhibitionist (mga nagpapakita ng maseselang bahagi), matanda, bata, sanggol, malapit nang matepok, nakapatay, mahilig mag-1-2-3, may kuto, may uban (buhok na puti), may putok, may galis, may alipunga, amoy isda, amoy baka, amoy kambing, amoy tae, amoy alak, amoy pusali, amoy anghel, amoy bad breath, amoy baboy, korteng baboy, bungal, puro ngipin, maganda, pangit, uhugin, mukhang showbiz, newscaster sa local na telebisyon na di naman masyadong kilala pero feeling nya sikat sya wala naman pumapansin, may kulangot sa ilong na di napapansin, may muta, may bakas ng laway sa pisngi, may tinga pa sa ngipin (nakikita pag nagsasalita o ngumingisi), maitim ang singit (bubuka-bukaka kasi), may lalaking di mai-tiklop ang hita kasi mababasag ang egg.... na binili, may mukhang tao, mukhang hayop, mukhang pimple na tinubuan ng mukha, at mukhang pwet...iba't iba. Ilan diyan, malamang, nakasakay mo na.



Madalas pa sa pagsakay ko ng jeep, mga akala mo kung sinong nagbayad ng buong jeep sa pag-upo ay halos kanila na ang malaking parte ng upuan. Ipipilit mong isiksik na lang ang sarili mo sa maliit na espasyo para lang makauwi na. Masaklap pa kung kahit 1/4 ng pisngi ng pwet ay di man lang maisampa sa upuan--nakasquat na lang.

Kanina, yan ang eksenang naranasan ko, pero nakaupo naman ako ng medyo maayos. Pero bago yun, natagalan pa ako sa pag-upo dahil walang gumagalaw sa kinauupuan nila. Kelangan ko pang magsalita para lang may umusog ng konti.

At napaupo ako sa harapan ng isang lalaking may supot na dala. Pagkaaaaaaaaaaalaki-laki ng bukaka. Kalahating dipa na ang luwang ng pagkakabuka ng dalawang hita. Napapamura na ako sa sarili ko at gusto ko na siyang sitahin. Itatanong ko sana kung may mababasag ba sa dala-dala niya at di niya mai-tikom o mapaglapit ng konti ang mga hita nya. Dalawang tao pa kasi ang pwedeng umupo sa tabi niya. At may kachismosohang taglay pa, dahil ang katabi nya ay nagtetext, nakikibasa siya ng text. Sure ko na di niya yun kakilala. Ang matindi pa nito, nag-dial (nangulangot) pa siya ng ilang beses sabay hawak sa bakal na hawakan (ano bang tawag dun?) Kadiri!

Eto pa ang kadiri. Kahapon, medyo mainit ang ulo ko. May ale akong nakatabi, pagkakatanda ko ay naka-pink siya na sando. Akalain mo ba namang umubo ng malakas at di man lang nagtakip ng bibig! Grabe! Ramdam ko ang lakas ng hangin na ibinuga niya at ang tiny droplets of saliva with virus ang kanyang ibinahagi sa akin. Syempre nainis ako, pero di ko inaway. Mariin kong pinunasan ang pisngi ko na pinapakitang may tumalsik sa akin na laway niya. Umubo ulit, pero nakatakip na ang bibig (nakaramdam) pero umulit uli at di nagtakip ng bibig. Buti na lang pababa na ako. Di ko na lang pinatulan kasi masama akong mang-away. Matrona kasi, ayokong masira lalo ang araw ko dahil sa kanya.

May pasahero ding PDA. Halos gawing motel o parke ang loob ng jeep kahit may tao sa paligid. Siguro ay nang-iinggit. Pero di nila alam na di sila nakakatuwang tingnan. May naghahawakan ng kung-anu-anong parte ng katawan. Minsan, babae pa ang naglalagay ng kamay ng lalaki sa part na gusto nya. Buti na lang walang naghuhubad dun. Tinalo pa nila ang may mga topak na naghuhubu't hubad sa kalye. Tsk tsk.

Meron ding parang naka-loud speaker sa lakas ng pakikipagusap sa phone. Tanggal na siguro ang tutuli ng kausap niya, eh di pa din maintindihan at sumisigaw din siya.

Minsan din ay naranasan ko na biglang may magtataas ng kamay sa bintana at halatang manghihipo lang o chachansing. Buti na lang lagi akong may panangga sa mga manyak na yan. Sarap putulin ng mga kamay ng mga paksyet na yan.

Di rin mabubuo ang linggo ng pagiging pasahero kung hindi magbubuga ng usok sa loob ng jeep. May malaking NO SMOKING pero di matigil sa hithit-buga. Bagong ligo pa naman tapos biglang mauusukan lang. Di ko masabihan kasi natatakot ako na awayin ako. Shy ako.

Pero kung usok lang naman, mas gusto ko pa yun kesa sa PUTOK! Usok o putok? Magpapakamatay na lang ako! Parang suicide din kasi yung pagtyatyagang maamoy yun!

Kayo, anu-anong klase ng kapwa pasahero ang nakakasabay nyo?




-----------------------------


Post ko ito noong Ika-21 ng Mayo, 2009. Nirepost ko ito sa kagustuhang makakuha ng kahit na anong mai-lilimos mula sa pacontest ni Gillboard